Mais de quinhentas pessoas reclamam na manifestaçom de Causa Galiza autodeterminaçom frente à constitución imposta
Mais de quinhentas pessoas acudírom à convocatória da Causa Galiza este 6 de Dezembro em Vigo.
Baixo o lema “Pola autodeterminaçom, nom à constituiçom espanhola”, a manifestaçom partiu passadas as 12:30 da Via Norte da cidade, e rematou às 13:45 horas na praça da Princesa. Neste lugar, Pilar González e Paulo Parga derom leitura ao manifesto da marcha, no que se destaca o carácter imposto da carta magna espanhola e se reivindica o direito à soberania galega.
A manifestaçom finalizou, umha vez lido o manifesto, com o canto do hino nacional. Depois de ter rematado, uns/umhas encarapuzad@s figerom apariçom com um retrato realizado em madeira do monarca espanhol Juan Carlos de Bourbon que procedérom a queimar. Às dúas e meia da tarde, boa parte dos participantes na marcha realizárom um jantar de convívio no Centro Social Faísca.
O éxito da manifestaçom tem especial significado ao tratar-se dum acto realizado fóra da capital do país, que adoita ser o cenário para as reclamaçons soberanistas. O feito de sacar a reivindicaçom além dos límites de Compostela está motivado polo objectivo da Causa Galiza de realizar umha campaña pedagógica intensiva para socializar o significado e necessidade do direito de autodeterminaçom e reivindicar o seu reconhecimento e exercício. Neste sentido, a plataforma, na que confluem as distintas sensibilidades comprometidas com a soberania da Galiza, está a impulsionar neste momento a sua estrutura comarcal e local por todo o país.
Todas as pessoas, colectivos e organizaçons políticas aderidas à Causa Galiza coincidem no rejeitamento da constituiçom espanhola surgida da reforma do regime franquista, que é o quadro jurídico, político e administrativo para a opressom da Galiza e a exploraçom do povo trabalhador. Por isso, insistimos de novo na reivindicaçom elementar da soberania galega, sem ceder nem un milímetro na exigência da autodeterminaçom como única garantia democrática frente à imposiçom constitucional. O reconhecimento deste direito é umha garantia fundamental dum futuro de liberdade e justiça social, porque sem autodeterminaçom nom pode haber democracia.
Causa Galiza foi apresentada publicamente o passado 14 de Julho na Igreja de Sam Martinho Pinário deCompostela. No dia da Pátria reuniu mais de duas mil pessoas na manifestaçom que organizou a favor do direito de autodeterminaçom, na que foi a maior reivindicaçom soberanista galega dos últimos anos.
